• 羅健熙 LO Kin Hei

區議會當政後的挑戰

尋晚寫咗堆做區議員千古不變的原則,今晚寫其他,繼續權充經驗分享。寫寫下原來又好長。

  1. 團結。我估計是所有人對民主派最大的擔憂,自問都是一個團結派,希望各區民主派內部有咩都可以攞出嚟傾。一係就開心見誠講,一係就啃咗佢唔講;唔好單打,唔好背後講。你背後講完,最後一定傳番去你講嗰個人耳邊。

  2. 立法會。贏議席,人人自覺英明神武就爭位,比例代表制出十九幾隊靠選民智慧自己配票。立法會大選睇怕都唔會協調到,但希望最少可以參考下我喺之前九西補選有提過既「棄選」機制。香港市民係希望我地團結對外,民主派要爭氣俾香港人睇

  3. 打建制不打市民。有些團體/撥款,是建制組織申請,然後有某些居民受惠,到選舉時建制組織就變身選舉機器一部份。打擊建制派借公帑做選舉機器時,要小心唔好變咗打擊居民,中間實際點做我都唔肯定,case by case 見步行步,總之步步為營。

  4. 區議會的權力。很多人說區議會沒權,我入議會八年來做的就是不停去爭權奪權。區議會權力很vague,沒有寫明白,靠政府施予「下放權力」就只有無了期等待。權力空間在於區議會如何演繹自己角色、如何理解區議員身份,在不同場景下嘗試介入,政府不阻止權力以後就歸了區議會。部門阻止,這次爭輸,下次爭贏,總有天會爭到。過程當然漫長,佔議會多數都不代表部門會自動讓你,但唔爭就只會永遠等待。

  5. 權力與責任。我觀察過去建制派不爭權,除了很快覺得自己「僭越」而劃地為牢外,另一個很重要的因素是「責任」的問題——做錯決定邊個孭飛呀?沒錯,有權力就必然有責任。民主派想區議會有更大權,就要有勇於take up埋呢啲責任既承擔,唔好做啲有威就自己攞,衰咗就賴部門既仆街縮骨嘢。呢八年來,為了說服部門做某些決定,我成日都講「唔駛驚,有事我孭咗佢囉,我要選都未驚」,就係咁既原因。

  6. 耐力。要喺架構入面做轉變,係一件好困難亦好漫長既事。攞到議會多數可以稍為加快,但快係咪就等於好,我會放一個問號(王莽變法、百日維新都值得借鑑)。好多制度,想改得好就要花時間去掌握、去了解、去磨,要有耐性去處理

  7. 會議常規。基本上係每個區議會的rulebook,南區我地每屆都會喺屆前仔細讀,睇下有冇咩規則要更改,或者有冇嘢係需要與時並進,用新方式處理。會議常規執得好,議會運作就會更加順暢。當然,亦有部份係文法問題、寫到唔清唔楚而要改;亦有啲係純粹中文問題,例如 Standing Order 第一條,議員發言係用「中文」定用「粵語」?

諗到咁多就寫住咁多先,之後諗到再寫。



25 次瀏覽0 則留言

最新文章

查看全部